Este mércores celebrouse, a proposta do novo conselleiro de Facenda, Valeriano Martínez, unha xuntanza coa CIG-Área Pública na que esta exixiu o remate das reducións salariais; o cobro das pagas extras o 100%; a supresión das taxas de reposición e a creación de emprego público. Xunto a isto manifestou a súa oposición á Lei de Emprego Público e diante da afirmación do conselleiro de que a Xunta considerará saldadas as débedas co persoal unha vez se pague a extra de 2012, asegurou que “nos seguirá tendo enfronte destas políticas inaceptábeis porque hoxe as e os empregados públicos cobran menos salario que en 2010”.

Na xuntanza participaron os secretarios nacionais da CIG-Ensino, Anxo Louzao; a secretaria nacional da CIG-Saúde, María Xosé Abuín e María Carme López Santamariña, secretaria nacional da CIG-Administración e portavoz da Área Pública.

López Santamariña sinala que, segundo explicou o conselleiro, a pretensión do goberno galego é aprobar a devolución da paga completa de 2012 cando se aprobe a Lei de Emprego Público, pola vía de incluír unha disposición adicional pola que se crea un fondo con este fin. 

A devolución desa paga extra sería o 25% en 2015 (o 12,5% foi en xaneiro e o 12,5% restante cando se aprobe esta Lei); o 50% en 2016 e o 25% restante en 2017. “Dese xeito, segundo nos dixo o conselleiro, a Xunta entende que xa queda saldada toda a débeda que ten coas empregadas e empregados públicos galegos”.

Ante isto a CIG-Área Pública non só amosou o seu asombro diante desta pretensión senón que a cualificou de “fraude” xa que a devolución da paga extra do 2012 é unha débeda contraída cos empregados/as públicos/as que nada ten que ver coa redución que están tendo nos salarios e a supresión dos complementos específicos nas pagas extra de 2013, 2014 e 2015, que tamén se adebedan. 

Mantéñense as taxas de reposición e a política de amortizacións

Xunto ás retribucións a Área Pública da CIG tamén puxo sobre a mesa aspectos relativos ás taxas de reposición e ás amortizacións, que tan graves consecuencias están a ter para os servizos públicos no seu conxunto e exixiu que, como mínimo, nas ofertas públicas de emprego saian todas as vacantes existentes.

Sobre esta cuestión, denunciou ademais que “o novo conselleiro limitouse a responder que a Xunta de Galiza ten que cinguirse ao que manda Madrid”. 

Martínez tampouco manifestou a súa dispoñibilidade para revisar a Lei de Medidas Temporais 1/2012, entre as cales está, por exemplo, a redución salarial por baixas por enfermidade. 

Diante disto, a Área Pública da CIG conclúe que a chegada dun novo conselleiro non supón cambio algún nas políticas que o Partido Popular vén desenvolvendo desde o goberno da Xunta. Políticas que están a provocar un grave deterioro dos servizos públicos e coas que pretende favorecer a súa privatización alén de supor un ataque aos dereitos laborais e salariais das empregadas e empregados públicos. 

Respecto da futura Lei de Emprego Público, á que a CIG se opuxo en reiteradas ocasións, exixiu ao conselleiro que nesta tense que contemplar, entre outras cuestións, a recuperación da obriga de realizar, como mínimo, unha das probas de acceso á función pública en galego, alén de amosarse total competencia no uso do noso idioma.