O Estado aplica a Lei Mordaza por manifestarse contra a LOMCE e os recortes na educación

A Delegación do Goberno en Galiza aplica unha sanción á CIG-Ensino por se manifestar na inauguración do curso escolar 2016/17 diante do IES San Rosendo de Mondoñedo

Nin nos calaron antes nin nos van calar agora. Nin con provocacións nin con sancións. Seguiremos loitando coa mesma firmeza e coa mesma contundencia. Mais esiximos que algo desa contundencia a apliquen aquelas persoas que se sentan no Congreso dos Deputados e que se comprometeron a derrogar tanto a LOMCE como a Lei Mordaza. Transcorrido máis dun ano após as eleccións xerais de xuño de 2016, e cun PP en minoría no Congreso dos Deputados, ambas leis seguen en pé. No comezo dun novo curso escolar, a LOMCE seguirá o seu camiño privatizador, antigalego e confesional e a Lei Mordaza estará aínda aí para protexela fronte a quen non nos dobregamos. Que saiban que non nos imos render.

O 4 de outubro de 2016 varias ducias de delegadas e delegados da CIG-Ensino manifestáronse diante do instituto mindoniense, coincidindo coa inauguración do curso académico de FP por parte da raíña Letizia, o Ministro de Educación e diversos cargos da submisa Consellaría de Educación. A concentración era unha resposta máis do sindicato contra os incesantes recortes educativos e para esixir a paralización da LOMCE e as reválidas.

Durante o transcurso do acto de protesta foron permanentes os impedimentos que se puxeron para poder exercer a liberdade de expresión, cambiando de lugar ás persoas que alí protestaban e identificándoas a todas. Foi un exemplo claro de como un partido político pretende, desde o poder, silenciar as protestas e penalizar a quen se atreve a contrariar o abuso de poder no que vive instalado o PP. A Lei Mordaza, o instrumento que o PP ideou para o control antidemocrático das loitas contra a restricións de dereitos, contra as mobilizacións que desoen as ordes de someterse obedientemente aos ditados do poder, aplicábase naquela xornada procurando evitar a protesta e, cando non o conseguiron, dificultándoa o máis posíbel.

A segunda parte desa presión para silenciar as críticas ás políticas neoliberais e de deterioro do ensino público é a sancionadora. A Delegación do Goberno ven de comunicar á CIG-Ensino unha sanción consistente nunha multa de 300€ por facer o que é a nosa obriga como organización sindical: rebelarnos contra os ataques ao ensino público e ao seu profesorado e estarmos en calquera sitio no que esa loita se poida facer efectiva; protestar fronte a quen implanta unilateralmente unha Lei retrógrada, segregadora, antidemocrática, confesional e españolizadora; facer todo o que estea na nosa man para reverter os recortes cos que o PP ven acosando o ensino público, tanto da man de Raxoi como da de Feixóo.

Nin nos calaron antes nin nos van calar agora. Nin con provocacións nin con sancións. Seguiremos loitando coa mesma firmeza e coa mesma contundencia. Mais esiximos que algo desa contundencia a apliquen aquelas persoas que se sentan no Congreso dos Deputados e que se comprometeron a derrogar tanto a LOMCE como a Lei Mordaza. Transcorrido máis dun ano após as eleccións xerais de xuño de 2016, e cun PP en minoría no Congreso dos Deputados, ambas leis seguen en pé. No comezo dun novo curso escolar, a LOMCE seguirá o seu camiño privatizador, antigalego e confesional e a Lei Mordaza estará aínda aí para protexela fronte a quen non nos dobregamos. Que saiban que non nos imos render.

Volver