A CIG Ensino anima a que se denuncie o sistema patriarcal que alenta e permite a desigualdade das mulleres e afirme a aposta pola coeducación e a educación inclusiva.

Logo de se coñecer o auto da Sección Segunda da Audiencia de Navarra, a CIG-Ensino vén de remitir a todos os centros educativos do país unha proposta de resolución para o claustro de profesorado e outra para os consellos escolares.

Nestas resolucións recóllese a preocupación do profesorado e do conxunto da comunidade educativa por todo o acontecido no xuízo da “Manada”, tanto no seu desenvolvemento como na sentenza ou a posta en liberdade provisional dos cinco violadores.

A CIG-Ensino entende que a gravidade dos feitos debe ser aproveitada para reflexionar sobre o noso papel como educadoras e educadores, sobre a existencia de desigualdades ou discriminacións caras as mulleres, mozas e nenas nos centros escolares, así como os recursos cos que contamos para erradicalas e apostar con claridade por un modelo educativo con firmes alicerces na educación inclusiva e a coeducación e que sirva para construírmos unha sociedade con igualdade efectiva entre mulleres e homes.

Nas propostas tamén se inclúe a demanda de que a Xunta cumpra as propias normas legais que aprobou e que faga efectivo o Plan de actuacións para a igualdade 2016-2020 que a día de hoxe ficou en declaración de intencións sen unha incidencia real nos centros e na comunidade educativa.