A CIG Ensino denuncia a continua improvisación coa que está a traballar a Consellaría de Educación neste comezo de curso e critica que se estea a xogar co profesorado. Os erros da Consellaría inclúe igualmente a non adxudicación de prazas resultas de docentes que acadaron un novo destino noutro corpo.

A Consellaría de Educación púxose onte en contacto con docentes afectados pola adxudicación de destinos das especialidades de Saxofón, Tuba, Trompa, Fundamentos de composición, Historia da música e Linguaxe musical para comunicarlles que erros graves na adxudicación publicada o pasado día 11 levaron a administración educativa a facer de novo unha adxudicación, que se publicará na mañá de hoxe, 14 de setembro.

Algunhas das persoas afectadas xa tomaran posesión do seu destino e mesmo renunciaran a postos de traballo na empresa privada. Para a CIG-Ensino este novo erro da Consellaría non pode prexudicar ninguén máis ala dun cambio de destino que xa é prexuízo bastante e esixe da administración galega a colocación do profesorado que se poida ver afectado por estes cambios noutros centros educativos. Animamos a todas aquelas persoas afectadas a que presenten reclamacións se a Consellaría non dá resposta satisfactoria logo deste cambio.

Desde a CIG-Ensino xa criticamos a finais de xullo a improvisación coa que xogou a Consellaría cos destinos provisionais de Secundaria, levando a que se tiveran que publicar dúas adxudicacións polos numerosos erros cometidos na primeira.

Outro dos erros que desde a CIG-Ensino denunciamos é a non adxudicación de diversas prazas que deixa vacantes o profesorado que accedeu, por promoción interna, a outro corpo e tiña destino definitivo no anterior. O feito de que as resultas que deixa este profesorado non se adxudicasen o día 11 implica que se estean a ofertar agora telefonicamente, impedindo que puidesen ser adxudicadas a profesorado en expectativa ou interino con mellor posición na lista.

Este feito, xunto co xa habitual goteo de interinidades que se van incorporando nos primeiros días provoca claros prexuízos e discriminacións ás persoas que obtiveron destino na adxudicación informática. A CIG-Ensino volve de novo esixir que rematen estas prácticas e erros e que se limiten a casos excepcionais e redobramos a nosa insistencia na transparencia e publicidade nos cadros de persoal e cupos dos centros de secundaria, FP e réxime especial.