A CIG non asinará acordo algún con Facenda que non contemple a recuperación de dereitos

O conselleiro anunciou esta mañá que a Xunta non negociará esa recuperación

O conselleiro de Economía, Valeriano Martínez, convocou esta mañá á Área Pública da CIG a unha xuntanza para presentar as propostas da Xunta de Galiza relativas ao Plan de Estabilización de Emprego nas administracións públicas galegas; a Lei de Orzamentos 2018 e a Lei de Medidas Temporais; propostas que a CIG rexeitou anunciando ademais que non asinará acordos que non garantan recuperación de dereitos do persoal das administracións públicas galegas.

Plan de Estabilización

No relativo ao Plan de Estabilización o conselleiro anunciou que a Xunta ten a intención de aprobar un acordo marco que atinxa os anos 2018, 2019 e 2020 no que se contempla consolidar emprego e trasladar a Galiza o acordo que se asine en Madrid este ano máis o asinado cos sindicatos españois xa en marzo de 2017. 

A CIG denunciou ademais que “ese acordo vai consolidar os recortes de persoal que se fixeron ao longo de todos estes anos”

A este respecto, a Área Pública da CIG manifesta que “é lamentábel que a Xunta de Galiza traslade mimeticamente un acordo acadado en Madrid, sen facer sequera o esforzo de adaptalo ás especificidades da administración pública galega, nin ter en conta a situación na que se atopa o seu persoal”.

A CIG denunciou ademais que “ese acordo vai consolidar os recortes de persoal que se fixeron ao longo de todos estes anos”. A isto engadiuse desde a CIG que “lonxe de como o intentan vender publicamente non suporá un aumento de emprego público xa que o que vai facer é darlle saída a unha situación insostíbel de temporalidade que hai hoxe na administración pública galega para lavar a súa imaxe”.

Con todo, o texto non foi entregado na xuntanza e, segundo informou o conselleiro, será remitido no decurso deste martes día 10. A Área Pública da CIG, unha vez o avalíe pormenorizadamente,  dará conta da súa posición definitiva respecto do mesmo.

Lei de Orzamentos 2018

No relativo a incrementos salariais, que teñen que ser recollidos na Lei de Orzamentos, o propio conselleiro sinalou que a situación, por mor da paralización dos Orzamentos Xerais do Estado, “non lles permite avanzar nesta cuestión” o que implica que as traballadoras e traballadores da administración verán máis unha vez os seus salarios conxelados até que desde Madrid lles diten o que teñen que facer.

Isto denota “a grave incapacidade da Xunta de Galiza para tomar as súas propias decisións cando ten competencias para  facelo”. Lembremos que durante estes últimos anos a Xunta “decidiu recortarnos, entre outras cousas, o 40% das pagas extras desde o ano 2013 ao 2016 e para iso non solicitou permiso algún a Madrid para executar ese roubo”.

A CIG denuncia ademais que o propio conselleiro xa anunciou que non tiña intención algunha de abordar calquera caste de recuperación de dereitos laborais, salariais ou sociais do persoal das administracións públicas galegas. 

Lei de Medidas

En canto á Lei de Medidas Temporais, o conselleiro anunciou modificacións no referido a permisos de maternidade/paternidade na liña do xa anunciado por Feixóo no debate do Estado da Nación. A CIG xa adiantou sobre esta cuestión que “a postura acordada pola central sindical é de loitar por conseguir permisos de maternidade de, como mínimo, un ano e igualar estes co de paternidade”.

Desde a CIG trasladamos a necesidade de que nas ofertas de emprego se partise da necesidade de volver ás cargas lectivas de 2009 (18 horas lectivas en secundaria e 21 en infantil e primaria)

Inmobilidade da Xunta ao respecto do persoal docente.

Xa desde unha perspectiva do traballo do persoal docente, desde a CIG trasladamos a necesidade de que se recuperasen os dereitos que nos foron recortados desde a chegada de Feijóo á Xunta. Así, demandamos que se tivesen en conta, tanto para os orzamentos como para as ofertas de emprego públicos determinados condicionantes que afectan ao profesorado galego.

Desde o punto de vista económico os e as docentes do noso país sufriron en maior medida os recortes retributivos, xa que mentres outros gobernos autonómicos evitaron os recortes nas pagas extras ou eliminaron eses recortes xa hai un ou dous anos, a Xunta provocou que o profesorado galega perdese nos últimos anos entre 31.227€ e 55.138€ no seu poder adquisitivo. Isto é, o persoal docente galego en só seis anos perdeu o equivalente a un ano e medio de salario. 

Desde o punto de vista das condicións nas que o profesorado desenvolve o seu traballo, desde a CIG trasladamos a necesidade de que nas ofertas de emprego se partise da necesidade de volver ás cargas lectivas de 2009 (18 horas lectivas en secundaria e 21 en infantil e primaria), o que implicaría un maior número de prazas nas oposicións e conseguir que o noso traballo se realice en mellores condicións, o que redundaría nunha mellora importante da calidade do ensino público galego.

Plans de Igualdade nas Administracións Públicas Galegas

Ademais a CIG puxo sobre a mesa tanto a situación na que se atopan os xulgados de violencia de xénero como a demanda de aplicación real e efectiva da lexislación actual en materia de igualdade, para garantir a igualdade real entre homes e mulleres na administración pública galega a través da negociación de Plans de Igualdade de Oportunidades. 

Unha demanda que xa lle fixo chegar a central sindical ao propio Presidente da Xunta no mes de xullo e que recibiu como resposta literal que con data de 21 de agosto “deuse traslado deste á Vicepresidencia e Consellaría de Presidencia, Administracións Públicas e Xustiza, para o seu coñecemento e efectos que procedan”.

Traslado do que non tiña constancia o conselleiro tras ser preguntado por esta cuestión para saber se se procedería a adoptar algunha medida. En todo caso “á marxe de recoñecer as eivas da administración pública galega respecto desta materia o conselleiro non se comprometeu a solucionar nin esta cuestión nin a situación dos xulgados de violencia de xénero”. 

Volver