A CIG esixe que se despexe calquera dúbida sobre a continuidade dos postos de traballo da Escola de Música

O Secretario Comarcal da CIG Ensino anima a Martiño Noriega a manter o seu compromiso co persoal da escola

Ante as novas aparecidas na prensa durante a mañá de hoxe a respecto da situación na Escola de Música de Santiago de Compostela a CIG-ENSINO, en palabras do seu Secretario Comarcal, Rubén F. Monteagudo “lamenta a mala xestión de todo este proceso por parte do goberno municipal, xa dende a elaboración e aprobación dos pregos de contratación”.

Aínda á espera de coñecer a resolución xudicial que citan algúns medios de comunicación no día de hoxe, Rubén F. Monteagudo afirma que “o concello ten que solucionar definitivamente este problema. Esixímoslle que manteña o compromiso dado aos traballadores e traballadoras e que polo tanto, teñamos absoluta garantía e seguridade do mantemento de todos e cada un dos postos de traballo da EMM e, polo tanto, de que se inicie o curso 2018/2019 con total normalidade”. “Lembramos ademais que nada disto tería acontecido se a prestación deste servizo fose de xestión pública, un obxectivo este, a remunicipalización que dende a CIG voltamos poñer enriba da mesa”. 

A este respecto, a  CIG-ENSINO afirma que esta mesma mañá xa se dirixiu ao grupo de goberno de Santiago “amosándolle a preocupación da central e do conxunto de traballadores da escola de música ante esta nova situación e animando ao alcalde, Martiño Noriega a manter o seu compromiso e neste eido, e polo tanto, despexar canto antes calquera dúbida sobre o mantemento dos postos de traballo, do contrario iniciaremos de xeito inmediato unha nova xeira de mobilizacións”.

Volver