A CIG-Ensino rexeita o cambio de actitude do PP ante o decreto de normalización lingüística
Normalización lingüística
A CIG-Ensino rexeita o cambio de
actitude do PP ante o decreto de normalización lingüística
A CIG-Ensino quere manifestar o seu rexeitamento ao cambio de
actitude do Partido Popular ante a publicación do Decreto 124/2007 que regula o
uso e a promoción do galego no sistema educativo.
É inaceptábel que, despois de aprobarse o Plan Xeral de Normalización
Lingüística, presentado por unha Consellaría de Educación dirixida polo Partido
Popular, e despois de ser aprobado por unanimidade do Parlamento galego, hoxe o
PP mude de posición diante dun Decreto que ten por obxecto desenvolver aquel
Plan Xeral, un Plan Xeral que estabelecía a necesidade de acadar o 50% da
docencia en lingua galega e indicaba xa que a materia de matemáticas sería
impartida nesta lingua. Ademais o Decreto foi elaborado tendo en conta a opinión
de todos os grupos parlamentarios, polo que o PP xa mostrara, durante a
elaboración da norma, a súa aceptación do texto.
Esta viraxe do PP só pode ser explicada como unha mudanza provocada
por intereses exclusivamente políticos que levan a esta organización a empregar
o noso idioma como elemento de oposición ao actual goberno de Galiza. Para a
CIG-Ensino esta actitude é fondamente criticábel, pois consideramos que o noso
idioma non debe ser instrumento de confrontación política senón obxecto de
potenciación e normalización por enriba de posicións
ideolóxicas.
En contra do que manifesta o Partido Popular, este Decreto só fixa
unha impartición do 50% das materias en lingua galega, pois ten como obxectivo
que o alumnado galego acade, ao rematar os seus estudos, uns niveis de
coñecementos parellos do galego e do español.
A CIG rexeita este cambio de actitude que só vai prexudicar o noso idioma e a todas aquelas persoas
que, como recoñece a Carta europea das Linguas, , teñen dereito a empregar a súa
lingua propia, a lingua propia de Galiza, a única lingua dos galegos e as
galegas que foi desprazada coa imposición do español e que, documentos como o
Plan Xeral e o Decreto 124, tentan recuperar.
Novas relacionadas
